Fiskroð breytist í lækningavörur á Ísafirði

Fyrirtæki sem þróar og framleiðir hátækni lækningavörur úr fiskafurðum er að byggjast upp á Ísafirði. Roð og lýsi breytast þar í sáravörur fyrir sjúkrahús. Fyrrum fiskvinnslusalur er nú sótthreinsuð rannsóknastofa á vegum Kerecis þar sem hvítklæddir sérfræðingar bogra yfir tilraunaglösum.

Ísfirðingurinn Guðmundur Fertram Sigurjónsson efnaverkfræðngur er frumkvöðull starfseminnar en hann fékk Baldur Tuma Baldursson húðlækni í lið með sér og síðan fleiri sérfræðinga. Fyrstu vörurnar eru komnar í apótek, fótakrem og húðkrem gegn þurri og storkinni húð, og nú er stefnt á sjúkrahúsamarkað heims með nýjar sáravörur, sem hér er verið að þróa, stoðefni til að vinna á þrálátum sárum, meðal annars vegna vaxandi sykursýki og legusára.

Þarna vinna efnafræðingur, efnaverkfræðingur, hjúkrunarfræðingar og líffræðingur en fyrir langskólamenntaðan Ísfirðing, eins og Dóru Hlín Gísladóttur efnaverkfræðing var ekki sjálfsagt að fá starf á heimaslóðum. Í viðtali í fréttum Stöðvar 2 lýsir Dóra Hlín starfseminni nánar og ástæðum þess að Ísafjörður hentar vel fyrir svona fyrirtæki.