AGS aðstoðar við gerð laga um fjármál hins opinbera

Í nýrri skýrslu starfshóps AGS eru ráðleggingar til stjórnvalda við setningu nýrrar rammalöggjafar um fjármál hins opinbera. Fjármálaráðuneytið bað um skýrsluna. Frumvarpsdrög eiga að verða til fyrir þinglok.

Ný rammalöggjöf um fjármál hins opinbera á að taka á vöntun, glufum og ósamræmi í lagaumhverfi sem átti þátt í fjármálalegum óstöðugleika fyrir hrun. Þetta er meðal þess sem fram kemur í nýrri skýrslu starfsmanna Alþjóðagjaldeyrissjóðsins (AGS).

Fjármálaráðuneytið fór fram á tæknilegt liðsinni sjóðsins við undirbúning nýrrar rammalöggjafar.

Skýrslan, sem kom út í gær, nefnist „Toward a New Organic Budget Law“. Í henni segir að upprisa Íslands úr efnahagshruninu 2008 feli í sér einstakt tækifæri til að endurskoða löggjöf og vinnuferla sem mótað hafi ákvarðanir í opinberum fjármálum síðasta áratug.

Starfshópur sjóðsins fundaði hér á landi 18. til 31. október síðastliðinn með nefnd fjármálaráðuneytisins um endurskoðun gildandi löggjafar, auk fjölda fólks sem kemur að ákvarðanatöku um opinber fjármál. „Skýrslan og tilmæli hennar eru fyrsta innleggið í vinnu nefndar ráðuneytisins,“ segir í skýrslunni. Auk þess að taka á glufum og ósamræmi telur starfslið AGS að ný löggjöf eigi að festa í sessi góða fjárlagahætti sem teknir hafi verið upp eftir hrun, búa til styrkan grunn sjálfbærrar fjármálastefnu til framtíðar og um leið koma Íslandi í hóp þeirra landa sem fremst standa í umgjörð opinberra fjármála í heiminum.

Skýrslan, sem er um 80 síður, er nokkuð ítarleg og í henni er að finna samanburð við önnur lönd, sér í lagi þar sem lög um opinber fjármál hafa verið endurskoðuð. Lagðar eru til aðferðir til að koma meiri aga og skipulagi á undirbúning fjárlaga og ákvarðanatöku á Alþingi. Þannig ætti eftir gildistöku nýrra laga að heyra sögunni til að mál einstakra stofnana dúkki upp á síðustu stundu við gerð fjárlaga. Komi í ljós að stofnun skorti fé eftir að búið er að úthluta fé til hennar málaflokks, þá verði ekki annað í boði en tilfærsla fjármuna sem ætlaðir hafa verið til þess flokks, en ekki aukin fjárútlát ríkisins.

Guðmundur Árnason, ráðuneytisstjóri í fjármálaráðuneytinu, sem fer fyrir nefndinni um rammalöggjöfina nýju, segir mikla áherslu lagða á verkefnið. Hann segir gildissvið fjárreiðulaganna, sem á sínum tíma hafi verið mikil framför, vera tiltölulega afmarkað. „Til hefur staðið að setja almennari lagaramma sem tekur til allra þátta, áætlanagerðar í ríkisfjármálum, fjárlagaferlisins, framkvæmdar fjárlaga og eftirlits með henni, sem og reikningshaldi,“ segir hann og kveður drög lögð að mjög heildstæðri lagasetningu.

Með skýrslu sérfræðinga AGS segir Guðmundur fram komið gagn sem eigi eftir að nýtast mjög vel í þeirri vinnu sem hafin sé. „Ef allt gengur að óskum vonumst við til þess að hægt verði að kynna heildstæð frumvarpsdrög þegar líður að þinglokum,“ segir hann.

Drögin verði þá lögð fram til kynningar á Alþingi. „Tímaáætlunin er nokkuð knöpp en við teljum okkur geta unnið þetta vandlega og af kostgæfni innan þessa tímaramma. Síðan mun þingið væntanlega þurfa rúman tíma til að fara yfir málið,“ segir hann.

olikr@frettabladid.is