Ívar spenntur fyrir Óskarnum - Allt í beinni á Stöð 2 í kvöld

„Maður er búinn að gera þetta í nokkur ár, þetta verður bara skemmtileg upplifun," segir Ívar Guðmundsson útvarpsmaður á Bylgjunni. Óskarsverðlaunaafhendingin fer fram í kvöld og mun Ívar lýsa beint frá hátíðinni á Stöð 2 ásamt Skarphéðni Guðmundssyni.

Ívar segist hafa fyrst lýst frá Óskarnum á Stöð 2 árið 1996 eða 1997, en hafi þó ekki verið á hverju ári síðan þá. „Þetta er alltaf jafn skemmtilegt. Mér finnst nú skemmtilegra að horfa á hátíðina í beinni en að horfa á hana á upptöku. Þá er oft búið að stytta hana og klippa út skemmtileg augnablik," segir Ívar.

Óskarinn byrjar klukkan hálf tólf, en áður en verðlaunaafhendingin sjálf byrjar verður fylgst með rauða dreglinum. „Það er aðallega skemmtilegt að sjá viðtölin við stjörnunar. Ég er nú ekkert að missa mig yfir kjólunum en það er þó mest rætt um það. Það er greinilegt að þetta skiptir miklu máli því ef þú lítur ekki vel út, þá er liðið hakkað í sig daginn eftir í sjónvarpinu," segir Ívar.

Eins og áður segir hefur Ívar lýst nokkrum Óskarsverðlauanahátíðum. Hann segir að sú eftirminnilegasta sé frá árinu 1999 þegar Robert Benigni var valinn besti leikari í aðalhlutverki fyrir myndina Life is beautiful. „Hann var ekkert að leyna ánægju sinni með þetta ótrúlega afrek og stóð upp á stólum."

Ívari til halds og traust verður Skarphéðinn Guðmundsson, dagskrástjóri Stöðvar 2. „Hann var á Mogganum í gamla daga og hefur skrifað mikið um kvikmyndir og veit ótrúlega mikið um kvikmyndir," segir hann.

Hátíðin hefst klukkan 23:40 og verður í beinni útsendingu á Stöð 2.