Vill að aðildarviðræðunum ljúki fyrir næstu alþingiskosningar

Ögmundur Jónasson innanríkisráðherra vill að þjóðin fái að kjósa um aðild að Evrópusambandinu fyrir næstu alþingiskosningar sem fram fara á næsta ári. Þetta kom fram í þættinum Sprengisandi á Bylgjunni í morgun.

„Við þurfum að vega það og meta á hvaða stigi við göngum til kosninga og ég held að það sé miklu hyggilegra fyrir okkur að fá efnislegar niðurstöðu í viðræðurnar, sem ég samþykkti á sínum tíma og er ekki að hlaupa frá þeirri ákvörðun minni, og að á þær verði settur ákveðinn tímarammi. Þannig að í síðasta lagi verði málið gerð upp í þjóðaratkvæðagreiðslu fyrir næstu alþingiskosningar," sagði Ögmundur í þættinum.

Ögmundur sagði að nú þegar myndu liggja fyrir einhverjar efnislega niðurstöðu. Spurning snúist um að ganga að lögum og regluverki Evrópusambandsins. „En að öðru leyti hvernig við getum fengið tímabundnar undanþágur frá þessu regluverki, fáum niðurstöður um það. Gefum samninganefndinni okkar fyrirmæli um að þetta sé tímaramminn. Og að eigi síðar en í lok kjörtímabilsins, helst fyrr, miklu fyrr, þá verði málið útkljáð í þjóðaratkvæðagreiðsl," sagði Ögmundur.

„Þetta gæti skapað sátt vegna þess að þetta hefur sundrað þjóðinni. Við erum að verja gríðarlegum fjármunum og gríðarlegri vinnu í eitthvað sem hugsanlega skilar okkur ekki neinu."

Hægt er að hlusta á viðtalið við Ögmund hér.