Völva 2013: Bubbi fjölgar sér og Linda færir út kvíarnar

Linda Pétursdóttir, fyrrverandi fegurðardrottning Íslands, verður áberandi í viðskiptalífinu á næsta ári, að mati Völvu Lífsins, fylgiblaðs Fréttablaðsins. Spá Völvunnar fylgir Lífinu á morgun.

Völvan telur að Linda muni halda áfram með Baðhúsið og bæta við sig nýju fyrirtæki. Þar verði hún með heilsuátak fyrir erlenda ferðamenn. Nýja fyrirtækið verður vandað, að mati Völvunnar, og gerir stormandi lukku og færir mikinn gjaldeyri til landsins. Bubbi Morthens og Hrafnhildur eiginkona hans eignast dreng á árinu en Völvan sér mikla hamingju og vöxt í kringum þau.

Þá gerir Völvan ráð fyrir því að leikfélagið Vesturport muni halda áfram að gera garðinn frægan og fara víða með sýningu sem slær í gegn. Einn meðlimurinn muni þó fara út úr grúppunni þar sem kemur til ósætti sem ekki næst að lagfæra.

Þá rýnir Völvan í þjóðmálin, skoðar landspólitíkina, fylgi flokkanna, eldsumbrot sem verða á landinu svo fátt eitt sé nefnt.