Jón Margeir tólfti Íslendingurinn sem vinnur gull á Ólympíumóti

Íþróttasamband fatlaðra hefur tekið saman á heimasíðu sinni hvaða íslensku íþróttamenn hafa náð því að vinna gull á Ólympíumóti fatlaðra frá upphafi en Ísland eignaðist gulldreng á nýloknum Ólympíumóti London.

Sundmaðurinn Jón Margeir Sverrisson varð í London tólfti íslenski íþróttamaðurinn úr röðum fatlaðra til að vinna til gullverðlauna á Ólympíumóti. Jón Margeir, eins og frægt er orðið, vann til gullverðlauna í 200m skriðsundi í flokki S14, flokki þroskahamlaðra en hann setti einnig heimsmet í sundinu.

Á 32 árum eða frá árinu 1980 hefur Ísland unnið alls 37 gullverðlaun á Ólympíumótum fatlaðra og flest þeirra eða níu talsins vann Sigrún Huld Hrafnsdóttir á Ólympíumóti þroskahamlaðra í Madríd á Spáni árið 1992.

Listi yfir þá íþróttamenn sem unnið hafa til gullverðlauna á Ólympíumótum fatlaðra

Sigurrós Karlsdóttir - 1980

Haukur Gunnarsson - 1988

Lilj M. Snorradóttir - 1988

Geir Sverrisson - 1992

Ólafur Eiríksson - 1992

Sigrún H. Hrafnsdóttir - 1992

Guðrún Ólafsdóttir - 1992

Bára B. Erlingsdóttir - 1992

Katrín Sigurðardóttir - 1992

Kristín Rós Hákónardóttir - 1996/2000/2004

Pálmar Guðmundsson - 1996

Jón Margeir Sverrisson - 2012

Ísland hefur unnið til samtals 98 verðlauna á Ólympíumótum fatlaðra frá árinu 1980. All eru gullverðlaunin orðin 37 talsins, 19 silfurverðlaun og 42 bronsverðlaun.