Mjög dapurlegt að svindla á eldri borgurum

„Þetta er auðvitað mjög dapurlegt," segir Gunnar Rúnar Sveinbjörnsson, kynningarfulltrúi hjá lögreglunni á höfuðborgarsvæðinu, um tilvik þar sem óþekktur aðili hringdi í eldri borgara og bauð þeim ókeypis heimilisþjónustu. Grunur leikur á um að viðkomandi aðili hafi haft eitthvað misjafnt í hyggju. „En því miður er ekkert sem kemur manni lengur á óvart," segir hann og beinir þeim tilmælum til eldra fólks og aðstandenda að vera á varðbergi.

Sem stendur er enginn í sigtinu hjá lögreglu vegna hringinganna. Lögreglu hafa aðeins borist upplýsingar um eitt tilvik þar sem óþekktur aðili hringdi í ellilífeyrisþega og bauð honum heimilisþjónustu án endurgjalds í nafni ákveðinna samtaka. Þegar málið var kannað höfðu samtökin ekki boðið neina slíka þjónustu.

Lögregla varar fólk við að þiggja slíka þjónustu án þess að sannreyna fyrst að viðkomandi þjónustuaðili sé sá sem hann segist vera. Lögregla hefur hins vegar ekki hafið rannsókn á málinu.

Í fréttatilkynningu frá Reykjavíkurborg segir að borgin sé stærsti þjónustuaðili heimaþjónustu í borginni. Það séu ekki venjuleg vinnubrögð að hringja í fólk með slík tilboð. Eldri borgari fær ekki þjónustu án þess að sótt hafi verið um hana og umsókn farið í gegnum ákveðið ferli. Ekki sé venjan að starfsmenn borgarinnar komi án þess að búið sé að ákveða tíma. Ef fólk er í vafa getur það hringt í þjónustumiðstöð eða teymistjóra í sínu hverfi. Einnig er hægt að hringja í þjónustuver Reykjavíkurborgar 411 1111.