Fólk reiðubúið til að greiða tugi þúsunda fyrir dýrin sín

Töluvert er um það að fólk óski eftir því að dýralæknar á Dýraspítalanum í Víðidal geri kostnaðasamar aðgerðir á dýrum þeirra. Vísir sagði í dag frá litlum kettlingi sem fannst á göngubrú yfir Kringlumýrarbraut. Honum var ekið á Dýraspítalann þar sem kom í ljós að hann var fótbrotinn og aðgerð kostar 70-100 þúsund krónur. Ólöf Loftsdóttir, fagdýralækni gæludýrasjúkdóma, segir að dýrustu verkefnin séu aðgerðir vegna slysa, til dæmis fótbrot. Fólk vilji venjulegast láta gera allt sem hægt er að gera fyrir dýrin sín, en öðru máli geti gegnt um óskiladýr.

„Það koma alveg reikningar sem eru háir," segir Ólöf. Í mörgum tilfellum séu dýrin líka tryggð þannig að kostnaðurinn af aðgerðum þurfi ekki að vera svo hár fyrir fólkið. „Við hvetjum fólk til þess að tryggja dýrin. Vegna þess að iðgjaldið er ekki svo hátt yfir árið miðað við það að þetta getur skipt sköpum," segir Ólöf. Hún segir að dýratryggingar séu tiltölulega nýjar á Íslandi og vonandi fleiri sem tryggi dýrin sín.

Samkvæmt lauslegri könnun Vísis getur kostað á bilinu 10 - 15 þúsund krónur að tryggja hunda og ketti og er innifalið í því bæði ábyrgðartrygging og sjúkrakostnaðartrygging.