Ástæður þess að forseti Vítisengla var rekinn úr klúbbnum

Þrjár ástæður eru fyrir því að Einar „Boom‟ Marteinsson, forseti Vítisengla, var rekinn úr klúbbnum. Þetta kemur fram í skýrslu sem lögreglan hefur tekið saman um starfsemi Vítisengla og Vísir hefur undir höndum.

Í skýrslunni er greint frá því að þann 22. mars 2012 lagði lögreglan hald á fundargerðarbók Hells Angels auk annarra gagna við leit í félagsheimili þeirra að Gjáhellu í Hafnarfirði. Í bréfi sem Einar Ingi skrifaði klúbbnum þann 18. mars síðastliðnum og var inni í fundargerðarbókinni kemur fram að ástæður þess að Einar Ingi var kosinn út úr klúbbnum eru eftirfarandi:

1. Ósætti við að hann hafi skráð ákveðinn mann, kallaður Ingi, í stjórn félags sem stofnað var um rekstur húðflúrunarstofu

2. Slæm blaðaumfjöllun í tengslum við líkamsárásar- og kynferðisbrotamál þar sem Einar Ingi er meðal grunaðra. Einar Ingi var handtekinn í lok síðasta árs vegna málsins ásamt fleiri aðilum og hefur setið í gæsluvarðhaldi síðan.

3. Laun vegna öryggisgæslu sem Vítisenglar hafa sinnt við geymsluskúra í Móhellu, en talið var að Einar ætti að láta launin renna til samtakanna en ekki í eigin vasa eins og hann virðist hafa gert.

Umrædd skýrsla lögreglunnar hefur verið lögð fram í sakamáli vegna líkamsárásarinnar sem minnst er á hér að ofan. Aðalmeðferð í málinu lauk í síðustu viku og er búist við því að dómur verði kveðinn upp í málinu öðru hvoru megin við næstu mánaðamót.