Chelsea valtaði yfir QPR | Torres skoraði þrennu

Chelsea gjörsamlega rústaði QPR, 6-1, í ensku úrvalsdeildinni í dag en leikurinn fór fram á Stamford Bridge. Fernando Torres fór á kostum í liði Chelsea og gerði þrennu.

Leikurinn hófst heldur betur vel fyrir heimamenn en Daniel Sturridge skoraði strax eftir 45 sekúndna leik með föstu skoti fyrir utan teig. Þetta gaf tóninn fyrir heimamenn og  riðu heldur betur á vaðið næstu mínútur.

John Terry skallaði boltann í netið tíu mínútum síðar og kom Chelsea í 2-0. Þá var komið að Fernando Torres að stimpla sig inn í leikinn. Á næstu tíu mínútum skoraði Spánverjinn tvö mörk og allt í einu var staðan orðin 4-0 fyrir Chelsea og aðeins 25 mínútur liðnar af leiknum.

Staðan var 4-0 í hálfleiki og leikmenn QPR vildi helst að leikurinn myndi enda þá.

Síðari hálfleikurinn var ekki eins fjörugur eins og sá fyrri en Torres fullkomnaði þrennuna á 64. mínútu þegar hann slapp einn í gegn og renndi boltanum framhjá Paddy Kenny í marki QPR. Fernando Torres skoraði síðast þrennu í leik með Liverpool í september árið 2009.

Tíu mínútum fyrir leikslok skoraði Florent Malouda fínt mark fyrir heimamenn og staðan orðin 6-0.

Djibril Cissé náði aðeins að klóra í bakkann þegar fimm mínútur voru eftir af leiknum og skoraði ágætt mark fyrir QPR.

Chelsea er nú fimmta sæti deildarinnar með 61 stig, aðeins einu stigi á eftir Newcastle sem er í því fjórða.

Útlitið skánaði ekki fyrir QPR í dag en liðið er í 17. sæti deildarinnar með 34 stig, jafn mörg stig og Bolton sem er í 18. sætinu eða fallsæti. QPR þarf að berjast fyrir lífi sínu í deildinni næstu tvö leiki en liðið leit vægast sagt illa út í dag.