Öryggisvörður ársins bjargaði aldraðri konu

Öryggisverðir ársins 2011 eru Daníel Þór Hafsteinsson, Sigurður E. Kristjánsson og Þorsteinn R. Ingólfsson samkvæmt tilkynningu frá Öryggismiðstöðinni. Þeir komu allir að hjálparkalli þann 4. nóvember á síðasta ári.

Daníel Þór sem sinnti útkallinu á vettvangi færði á dögunum Helgu Harðardóttur myndarlegan blómvönd og þau rifjuðu upp atvikið þegar hann kom henni til bjargar.

„Hann bjargaði lífi mínu," sagði Helga þegar hún rifjaði atvikið upp. Útkallið barst til stjórnstöðvar rétt eftir miðnætti. Daníel Þór var mættur á staðinn fáeinum mínútum síðar.

„Hún hafði dottið og gat ekki komist á fætur af sjálfsdáðum. Nokkur reykur hafði myndast í íbúðinni frá potti sem var á hellu," rifjar Daníel upp.

„Ég var að flóa mér mjólk. Ég hafði engan kraft til að koma mér á fætur eða hreyfa mig til. Þarna bjargaði hnappurinn og öryggisvörðurinn lífi mínu. Ég hafði áður látið taka rafhlöðuna úr reyskynjaranum hjá mér þar sem hann var sífellt að fara í gang þegar ég eldaði. Þannig að enginn hefði komið mér til aðstoðar ef ég hefði ekki haft öryggishnappinn á mér" bætti Helga við.

Í samráði við hjúkrunarfræðing á stjórnstöð Öryggismiðstöðvarinnar var sjúkrabíll kallaður til og Helga færð til öryggis til skoðunar á sjúkrahús. Daníel Þór færði pott út á svalir og opnaði glugga til að reykræsta íbúðina.

Ásamt blómvendi var Helgu færður sérstakur reykskynjari sem er beintengdur öryggishnappnum þannig að hann sendir boð til stjórnstöðvar Öryggismiðstöðvarinnar samstundis þegar hann fer í gang. Slíkur reykskynjari er nú staðalbúnaður og fylgir án aukagjalds með öllum nýjum öryggishnöppum frá Öryggismiðstöðinni.