Barnaverndanefndir tóku á móti 24 tilkynningum á dag

Að meðaltali bárust tæplega 24 tilkynningar á dag til barnaverndanefnda í fyrra. Þeim fækkaði þó um 6,5% frá árinu á undan. Fjöldi tilkynninga í fyrra var í heild 8.661, en 9.264 árið á undan. Tilkynningum á höfuðborgarsvæðinu fækkaði um tæplega 2% og um 17% á landsbyggðinni þegar allt árið er skoðað. Á vefsíðu Barnaverndastofu segir að tilkynning til barnaverndarnefndar verði að barnaverndarmáli ef tekin er ákvörðun um könnun máls í kjölfar tilkynningarinnar.

Flestar tilkynningar í fyrra voru vegna áhættuhegðunar barna eða 44% árið 2011, en 47% árið 2010. Alls voru 32% tilkynninga í fyrra vegna vanrækslu, en 31% árið 2010. Hlutfall tilkynninga um ofbeldi í fyrra var 23%, en 22% árið 2010. Hlutfall tilkynninga árið 2011 vegna þess að heilsu eða lífi ófædds barns var stefnt í hættu var 0,9%, en 0,6% árið 2010.

Alls bárust 82 umsóknir um Fjölkerfameðferð í fyrra, en 77 umsóknir á árinu 2010. Fjölkerfameðferð, sem er yfirleitt kölluð MST meðferð, snýr að fjölskyldum unglinga með fjölþættan hegðunarvanda sem kominn er á það alvarlegt stig að vistun unglings utan heimilis er talin koma til greina. Markhópurinn eru unglingar á aldrinum 12-18 ára og fer meðferðin fram á heimilum fólks.

Umsóknum um meðferðarheimili fækkaði á árinu 2011 miðað við árið á undan. Umsóknir voru 92 á árinu 2011 en 141 á árinu 2010. Umsóknum um fósturheimili fyrir börn fjölgaði úr 113 í 144 á umræddu tímabili.