"Mér fannst eins og sumir væru komnir í framboð svolítið snemma"

„Nei, það kom ekkert upp á milli okkar Lilju en það voru þarna innan um einstaklingar sem ég hafði ekki áhuga á að vinna með," segir Sigurður Þ. Ragnarsson, betur þekktur sem Siggi Stormur. Hann hefur nú sagt skilið við nýja stjórnmálaaflið Samstöðu þar sem hann var varaformaður. Hann kveður sáttur en segist aldrei hafa ætlað í framboð.

„Það er allt að gerast, ég er bara brattur. Ég lofaði Lilju á sínum tíma að koma að því að búa til nýjan flokk. Ég gerði það og vann með honum ákveðna grunnstefnuskrá. Nú er búið að stofna flokkinn og næsti kafli framundan," segir Sigurður og tekur fram að aldrei hafi staðið til að hann væri í framboð í næstu kosningum. „Ég hef aldrei sagt það. Í þessu er svo mikilvægt að þú sért ekki búinn að ákveða fyrirfram hverjir eigi að vera í framboði."

Hann segir þó að ástæða þess að hann hættir nú sé vegna þess að hann hafi ekki fundið sig í hópnum. „Mér fannst eins og sumir væru komnir í framboð svolítið snemma, áður en það var tímabært að velta því upp. Svo höfðu menn miklar áhyggjur af því hverjir væru í fjölmiðlum," segir Sigurður.

Spurður hvort að einhverjir innan flokksins hafi verið öfundsjúkir út í þá umfjöllun sem hann hefur fengið segir Sigurður: „Ég þori ekki að fullyrða það, það var eitthvað nudd í kringum það. Aðalatriðið er að ef maður finnur sig ekki í tilteknum hópi. Ef einhver er með áherslur sem manni líkar ekki, hefurðu um tvennt að velja, að vera áfram eða fara. Ég valdi síðari kostin, ekki til að skemma fyrir flokknum, ég bara sá ekki ástæðu til að vinna innan um fólk sem ég skildi ekki á hvaða vegferð var."



Sigurður kveður þó sáttur og segist stoltur að hafa komið að því að stofna flokkinn. „Þetta er búið að vera hálft ár, allt í sjálfboðavinnu. Núna held ég bara áfram mínum störfum bæði sem blaðamaður og veðurfræðingur og sinni þeim störfum á víxl, auk smærri verkefna. Nú fær ég aðeins meiri tíma fyrir sjálfan mig, það getur engin kvartað yfir því að fá meiri tíma fyrir sjálfan sig," segir Sigurður.

En ætlar Sigurður Þ. Ragnarsson að kjósa Samstöðu í alþingiskosningunum á næsta ári? „Það fer alveg eftir því hverjir veljast til forystu og hvernig þeir vinna úr stefnuskránni. Það getur bara vel verið, mér finnst það sennilegt. Það er hinsvegar alltof snemmt að segja til um það."