Kærir málsmeðferð til Mannréttindadómstóls Evrópu

Baldur Guðlaugsson, sem dæmdur var í Hæstarétti í tveggja ára fangelsi fyrir innherjasvik, hefur falið lögmönnum að kæra málsmeðferð í máli sínu til Mannréttindadómstóls Evrópu. Afar fá mál sem kærð eru til dómstólsins eru tekin þar fyrir en á árinu 2009 voru aðeins tæplega 7% þeirra kæra sem bárust dómstólnum taldar tækar til efnismeðferðar.

Lögmenn Baldurs telja að með dómi Hæstaréttar frá 17. febrúar hafi í veigamiklum atriðum verið brotinn réttur á Baldri í skilningi ákvæða Mannréttindasáttmála Evrópu.

Í fyrsta lagi telja þeir að brotið hafi verið á rétti Baldurs til að þola ekki endurtekna málsmeðferð vegna refsiverðrar háttsemi en sá réttur er varinn í 4. gr. 7. viðauka við Mannréttindasáttmála Evrópu. Fjármálaeftirlitið rannsakaði mál Baldurs og tilkynnti honum í maí 2009 að rannsókn væri lokið en málið var svo endurupptekið stuttu síðar.

Þá telja lögmenn Baldurs að réttur hans til réttlátrar málsmeðferðar samkvæmt 6. gr. Mannréttindasáttmálans hafi ekki verið virtur þar sem hann hafi verið sakfelldur fyrir annað en hann var ákærður fyrir. Baldur var ákærður fyrir að hafa verið annar innherji í skilningi laga en sakfelldur fyrir að hafa verið tímabundinn innherji. Þá telja lögmenn Baldurs að réttur hans til réttlátrar málsmeðferðar hafi ekki verið virtur þar sem Hæstiréttur hafi ekki tekið afstöðu til vegamikilla atriða í vörn hans. Þá telja þeir að sönnunarbyrði hafi reynd verið snúið við í málinu og Baldur þannig ekki notið þeirrar grundvallarréttinda að teljast saklaus uns sekt er sönnuð og að verulegur vafi leiki á því að mál hans hafi notið óvilhallrar meðferðar fyrir dómi. Í tilkynningu frá Lex xegir að kæra verði send Mannréttindadómstólnum á næstunni.

Ekki er sjálfgefið að mál Baldurs verði tekið fyrir af Mannréttindadómstólnum en skilyrðin fyrir því að kæra teljist tæk til efnismeðferðar eru mörg og langfæst mál sem koma fyrir dómstólinn fá efnismeðferð. Þannig voru aðeins 2.395 efnisdómar kveðnir upp á árinu 2009 en 33.065 kærur voru taldar ótækar til efnismeðferðar. Samkvæmt þessu eru aðeins tæplega 7% þeirra kæra sem berast dómstólnum taldar tækar til efnismeðferðar.