Lögreglan braut upp hurð að fíkniefnasamkvæmi

Lögregla var kölluð að fjölbýlishúsi í borginni í nótt vegna hávaða frá samkvæmi þar. Þegar húsráðandi opnaði fyrir lögreglumönnum fundu þeir strax kannabislykt auk þess sem þeir sáu hvar gestur í samkvæminu var í miklum flýti að hella einhverjum efnum ofan í klósettið og sturta.

Í sama mund skellti húsráðandi hurðinni á lögreglumennina. Þeir brutu hana strax upp og féllst húsráðandi þá á að húsleit yrði gerð. Við hana fundust fíkniefni til viðbótar þeim, sem sturtað var niður og var allt fólkið tekið til yfirheyrslu.