Ódýrast að leigja á Norðurlandi

Leiga á hundrað fermetra íbúð í Reykjavík getur verið ríflega tvöfalt dýrari en leiga á sambærilegri íbúð á Norðurlandi.

Nú er hægt að nálgast upplýsingar um húsaleigu eftir staðsetningu og stærðarflokkum fasteigna á landinu allt frá janúar í fyrra til dagsins í dag en á þessum tíma hefur leiguverð hækkað að meðaltali um ellefu prósent.

Tölurnar byggjast á þinglýstum leigusamningum og gefa þar með ágæta vísbendingu um stöðu markaðarins.

Leigan er áberandi dýrust miðsvæðis í Reykjavík en hún hljóðar upp á rúmar 167 þúsund krónur. Hún lækkar um tæpar sautján þúsund krónur þegar við færum okkur austar en leigan á þessu svæði í Reykjavík er nánast á pari við leiguna í Kópavogi.

Sá sem sækist eftir að leigja í Breiðholti gæti átt von á að greiða tæplega 150 þúsund krónur fyrir sína veru en hann myndi þó greiða tæplega sjöþúsund krónum minna fyrir leigu á íbúð í Garðabær, Hafnarfirði eða á Álftanesi.

Enn ódýrara er að leigja í Grafarvogi, Grafarholti, Árbænum, Norðlingaholti og Úlfarsárdalnum eða 138 þúsund og á Kjalarnesi og Mosfellsbæ hljóðar leigan upp á rúmar 112 þúsund krónur.

Líkt og við var að búast lækkar leigan þegar farið er út fyrir höfuðborgarsvæðið.

Leigan á Suðurnesjum og Akureyri er svipuð, um hundraðþúsund. Þá er leigan á Vestur- og Suðurlandi á sama róli, rúmlega 95 þúsund. Hún er þó aðeins lægri á Vestfjörðum eða rúmlega 90 þúsund en langhagstæðast er að leigja íbúð á Norðurlandi, en leigan þar hljóðar upp á rúmlega 76 þúsund krónur.

Munurinn á dýrustu og ódýrustu leigunni er þá sumsé 120 prósent.

Frekari upplýsingar um leiguverð má finna hér.