Íhugaði sjálfsvíg vegna skulda - lögreglan bað um upplýsingar um hana

Lögreglan á höfuðborgarsvæðinu hafði samband við Marinó G. Njálsson, sem er í hagsmunasamtökum heimilanna, á dögunum og bað hann um upplýsingar um konu á sextugsaldri sem íhugaði að taka eigið líf í bréfi sem Marinó birtir á heimasíðu sinni.

Konan segir í bréfinu sem Marinó birtir á síðu sinni að kannski sé best að hún „klári þetta sjálf frekar en að fara í biðröð á elliheimili eða líknadeild þegar þar að kemur" en íbúðarlán konunnar hafa hækkað upp úr öllu valdi frá því hún tók það árið 2005.

Í bréfi sínu til Marinós segir konan meðal annars: „Auðvitað á ég yndisleg börn og barnabörn en sé bara fram á að verða baggi á þeim og ég veit nú þegar hafa þau áhyggjur af mér. Ég hef akkúrat ekki ráð á neinu. Ég hef stolt og mér finnst það bara hreinlega alveg óbærileg hugsun að geta ekki tekið þátt í lífun vegna fátæktar. Ég er nú þegar einangruð vegna féleysis og skammar yfir að vera atvinnulaus svona lengi. Nú þarf ég bara að safna kjarki til að ganga þannig frá málum að það valdi sem minnstri sorg meðal minna nánustu og að það sé borin virðing fyrir ákvörðun minni."

Marinó segist ekki vita hversu margar sendingar sem þessar hann hefur fengið frá efnahagshruni og biðlar hann til fjármálafyrirtækja að sýna manngæsku, skilning og auðmýkt.

„Aldrei ætla ég að voga mér að segja fjármálafyrirtækin bera ábyrgð þegar fólk tekur líf sitt, en þau eru hluti af því umhverfi sem margt örvæntingarfullt fólk er í. Ekki bara það, viðbrögð fjármálafyrirtækjanna eykur oft á örvæntingu fólks.

Til allra fjármálafyrirtækja: Sýnið manngæsku, sýnið skilning, sýnið auðmýkt! Þið munið hagnast á þessu þegar fram líða stundir," skrifar Marinó á síðu sína.

Heimasíða Marinós.