Sextán ára stúlku nauðgað af nokkrum mönnum í húsasundi

Sextán ára stúlka leitaði undir morgun á neyðarmóttökuna á Landspítalanum í Fossvogi eftir að hafa greint lögreglu frá því að henni hafi verið nauðgað af nokkrum mönnum í miðbæ Reykjavíkur. Barnaverndarnefnd hefur verið tilkynnt um málið.

Lögreglan fékk tilkynningu um málið rúmlega fimm í morgun. Stúlkan hafði samkvæmt heimildum fréttastofu verið með vinkonu að skemmta sér í miðbæ Reykjavíkur. Hún kom heim til sín í miklu áfalli og greindi foreldrum sínum frá því sem gerst hafði. Þeir höfðu strax samband við neyðarlínuna og var lögreglan send á staðinn. Stúlkan greindi þá frá því að henni hafi verið nauðgað af nokkrum mönnum í húsasundi í miðbæ Reykjavíkur.

Lögreglumennirnir fóru með hana á neyðarmóttöku fyrir þolendur kynferðisofbeldis á Landspítalanum í Fossvogi. Þar var hún skoðuð og hlúð að henni.

Sökum ungs aldurs stúlkunnar, en hún er aðeins sextán ára, var barnaverndarnefnd tilkynnt um málið.

Fréttastofu hefur ekki reynst unnt að afla sér upplýsinga um það hvernig rannsókn málsins gengur og hvort að einhver hafi verið handtekinn. Þrátt fyrir ítrekaðar tilraunir hefur ekki náðst í yfirmenn deildarinnar í dag.

Tvær aðrar konur leituðu á neyðarmóttöku fyrir þolendur kynferðisofbeldis á Landspítalanum um helgina.