Ólafur fær undirskriftirnar afhentar og boðar til blaðamannafundar

Ólafur Ragnar Grímsson forseti fær klukkan rúmlega fjögur í dag afhentan undirskriftalista þar sem hann er hvattur til þess að gefa kost á sér til endurkjörs. Hópur fólks stóð að söfnun undirskriftanna og áður en yfir lauk höfðu um 31 þúsund manns skorað á forsetann. Á meðal þeirra sem stóðu fyrir söfnuninni voru Baldur Óskarsson, Guðni Ágústsson og Ragnar Arndalds.

Í tilkynningu frá forsetaembættinu segir Ólafur muni taka á móti blaðamönnum eftir að hann tekur við listunum en hann hefur ekki viljað taka af öll tvímæli um hvort hann hyggist sækjast eftir endurkjöri eður ei.

Yfirlýsingin sem fólkið undirritaði er á þessa leið: „Við undirrituð skorum á þig, herra Ólafur Ragnar Grímsson að gefa kost á þér til forsetakjörs í sumar. Við treystum þér betur en nokkrum öðrum manni til að standa vörð um hagsmuni fólksins í landinu á þeim erfiðu tímum sem fram undan eru."