Austurríska leiðin nýtt einu sinni - 174 dvöldu hjá Kvennaathvarfinu

Árið 2011 var, eins og undanfarin ár, annríkisár í Kvennaathvarfinu. Þar dvöldu samtals 174 gestir, konur og börn sem ekki gátu búið heima hjá sér vegna ofbeldis að því er fram kemur í tilkynningu frá Kvennaathvarfinu.

Þar segir ennfremur að samþykkt laga um heimildir lögreglu til að fjarlægja ofbeldismann af heimili sínu, austurríska leiðin svokallaða, breytti engu þar um. Þó hefur lagaheimildin vafalaust skipt sköpum í lífi einnar konu, en heimildin hefur einu sinni verið nýtt og staðfest af dómara á þessum 9 mánuðum sem liðinir eru frá samþykkt hennar.

Konur og börn dvöldu í athvarfinu frá einum degi upp í tæpa fimm mánuði. Konur að meðaltali í 15 daga en börn í 21 dag. Erfiður leigumarkaður og þær staðreyndir að ofbeldismaðurinn hefur yfirtekið heimilið og að ofbeldinu er síður en svo lokið þegar konan yfirgefur ofbeldismanninn gerir það að verkum að dvöl er iðulega lengri en æskilegt er í neyðarathvarfi. Það var því oft þröngt á þingi í athvarfinu og ljóst að núverandi húsnæði er allt of lítið fyrir starfsemina.

Einnig leituðu í athvarfið rúmlega 200 konur í ráðgjafar- og stuðningsviðtöl og sjálfshjálparhópa án þess að koma til dvalar. Nýleg rannsókn bendir til að á einu ári séu um 1800 konur á Íslandi beittar líkamlegu og /eða kynferðislegu ofbeldi af hálfu maka eða fyrrverandi maka. Í ljósi þess eru konurnar sem leita í Kvennaathvarfið lítill hluti brotaþola og segir því aðsókn í athvarfið líklega lítið um tíðni ofbeldis í samfélaginu.

Konurnar í athvarfinu komu frá samtals 36 löndum en flestar eru íslenskar. Þó er um helmingur dvalarkvenna af erlendum uppruna.

Ofbeldismennirnir eru í flestum tilfellum núverandi eða fyrrverandi eigin- eða sambýlismenn kvennanna og því feður eða stjúpfeður barnanna. Þeir voru á aldrinum 16-85 ára þegar konan kom í athvarfið en meðalaldur karlanna er 44 ár.