Tengivagn fullur af diselolíu valt í Borgarhreppi

Tengivagn, fullur af díselolíu, valt skammt frá bænum Beigalda í Borgarhreppi, á þjóðvegi eitt nokkra kílómetra norðan við Borgarnes um ellefuleytið í morgun. Á vef Skessuhorns segir að bílstjóra olíuflutningabílsins sakaði ekki þar sem bíllinn hélst á veginum.

Slökkvilið og lögregla voru kölluð á vettvang en loka þurfti fyrir umferð vegna óhappsins. Eitthvað af olíu lak úr tengivagninum en slökkviliðsmönnum tókst fljótlega að stöðva frekari leka.

Svo grófu þeir skurð og veittu olíunni í farveg til að hún færi ekki út í nærliggjandi læk.

Í samtali við Skessuhorn segir lögreglan að von sé á dælubíl frá Olíudreifingu til að losa olíuna úr tengivagninum. Í framhaldinu verða svo framkvæmd jarðvegsskipti til að lágmarka sem kostur er mengun. Ástæður óhappsins liggja ekki fyrir en hálkublettir eru víða á vegum í Borgarfirði.