Þjóðin sjálf finnur sér forsetaefni

Ólafur Ragnar segir að það sé þjóðin sjálf sem finni sér forsetaefni, í samræðum inni á heimilum, á vinnustöðum og heima í héruðum. Það væri ekki hlutverk fjölmiðlanna að finna forsetaframbjóðandann heldur fólksins. „Það eru engin dæmi um þess að frambjóðandi lýsi yfir áhuga á framboði og fari svo og leiti sér stuðnings. Það gerist ekki þannig," sagði forsetinn.

Ólafur Ragnar tók í dag á móti rúmlega 30 þúsund undirskriftum þar sem skorað var á hann að gefa áfram kost á sér í embætti. Hann tók á móti áskorununum og ræddi svo við blaðamenn. Ólafur segist hafa verið búinn að taka ákvörðun um að láta af embætti. Hann hafi tilkynnt þá ákvörðun með skýrum hætti og rökstutt hana á nýársdag.