Steingrímur segir Geir Jón fara með dylgjur

Steingrímur J. Sigfússon, formaður VG, kallaði ásakanir Geirs Jóns Þórissonar, yfirlögregluþjóns lögreglunnar á höfuðborgarsvæðinu, dylgjur á þingi í dag. Þar svaraði hann fyrirspurn Gunnars Braga Sveinssonar, þingmanns Framsóknarflokksins, um það hvort það væri ekki tilefni til þess að hefja rannsókn á þeim ásökunum Geirs Jóns um að einstakir þingmenn hefðu stýrt mótmælendum gegn lögreglu í búsáhaldabyltingunni í janúar 2009.

„Ef að svona ásakanir verða uppi eða dylgjur sem ég kýs að kalla það þá skulum við rannsaka það og þá líka allt saman. Og við þurfum þá væntanlega að rannsaka mótmælin sem héldu áfram og urðu hér við þingsetningu í fyrra og hitti fyrra og hverjir tengdust þeim," sagði Steingrímur sem telur ásakanir Geirs Jóns tilhæfulausar. Steingrímur sagði ennfremur að það væri alvarlegt mál að setja fram svona ásakanir á hendur ónafngreindum þingmönnum. Hann sagði það beinlínis fjarstæðukennt að þingmenn hefðu fjarstýrt mótmælunum.

Gunnar Bragi sagðist skilja svar Steingíms þannig að hann væri hlynntur rannsókn og myndi þá væntanlega styðja þingsályktunartillögu hvað það varðar.