Ræninginn á Akureyri var orðinn staurblankur þegar hann náðist

Tæplega tvítugur piltur sem játaði við yfirheyrslur hjá lögreglunni á Akureyri i gærkvöldi að hafa rænt rúmlega hálfri milljón króna úr afgreiðslukassa í Fjölumboðinu á Akureyri á fimmtudaginn var, var orðinn staur blankur þegar hann var handtekinn aðfararnótt laugardags.

Ránsfengnum hafði hann eytt á rúmum sólarhring í fíkniefni, lyf og í fíkniefnaskuldir.Upphaflega fór maðurinn frá Reykjavík áleiðis til Akureyrar á stolnum bíl þann 22 þessa mánaðar, ásamt vini sínum. Þeir stálu auk þess bensíni á bílinn. Bílinn urðu þeir að skilja eftir í Skagafirði eftir að hafa fest hann, og brutust þeir þar inn í sumarbústað.

Svo komust þeir til Akureyrar þar sem annar framdi ránið. Hinn stal póstbíl, sem hafði verið skilinn eftir í gangi, braust síðan inn í annan bíl þar sem hann stal verðmætum og svo inn i einbýlishús fyrir austan Akureyri og stal þaðan talsverðum verðmætum.

Hann var síðan handtekinn á Svalbarðsströnd eftir eftirför lögreglu. Báðir hafa áður komið við sögu lögregu , báðir voru ökuréttindalausir, og báðir eru grunaðir um fíkniefnaakstur.