Óttast átök í undirheimum eftir íkveikjutilraun

Lögregla óttast að einhverskonar átök séu í aðsigi í undirheimunum eftir að reynt var að kveikja í íbúðarhúsi tveggja manna í Hafnarfirði í gær, en þeir tengjast vélhjólasamtökunum Outlaws.

Kastað var gleríláti með eldfimum vökva og logandi tappa, eða svonefndum Molotov-kokteil, að húsinu og náði eldurinn þegar mikilli útbreiðslu, en svo vel vildi til að að sprengjan fór ekki í gegnum glugga. Þá hefði húsið, sem er gamalt timburhús, fuðrað upp á skammri stundu, að mati lögreglu og íbúum verið bráð hætta búin.

Engin var heima þegar þetta gerðist og snarráður lögreglumaður sem sá eldinn, náði að slökkva hann með garðslögnu. Tveir menn búa á sitthvorri hæð hússins en þeir haf ekki gefið lögreglu neinar vísbendingar um hugsanlega gerendur.

Hinsvegar segir lögregla að það hafi mátt heyra af félögum þeirra úr mótorhjólasamtökunum, sem dreif að um leið og fréttist af íkveikjunni, að þeir teldu sig vita hverjir voru að verki, en vildu ekki upplýsa lögregluna um það. Hún óttast því einhverskonar uppgjör og lýsir eftir vitnum.