Sprengimaður á Suðurnesjum handtekinn

Karlmaður sem handtekinn var með vopn og sprengiefni á Suðurnesjum aðfararnótt mánudags, var yfirheyrður í dag. Ekki er útilokað að hann hafi sprengt upp fiskikar til prófa virkni sprengiefnisins.

Lögregla fékk tilkynningu um undarlegt háttarlag mannsins á samskiptavefnum Facebook að kvöldi sunnudags. Þar hafði hann birt mynd af sér berum að ofan í Sandvík með riffil í hönd. Á annarri mynd er hann með lambhúshettu og tekur símamynd af sér í spegli.

Maðurinn ógnaði sérsveitarmönnum með hnífi þegar þeir yfirbuguðu hann þá um miðnættið. Hann var leiddur fyrir Héraðsdóm Reykjaness í gær þar sem hann var úrskurðaður í vikulangt gæsluvarðhald á grundvelli rannsóknarhagsmuna.

Lögreglan lítur alvarlegum augum að hann hafi haft undir höndum talsvert magn af púðri, þráðum og blysum, auk tilbúinnar rörasprengju.

Þá birti hann myndir af því á Facebook þegar hann sprengdi upp fiskikar. Lögregla reynir nú að komast að því hvað vakti fyrir manninum

Auk sprengiefna og skotvopna var á heimili mannsins lagt hald á átta hnífa.