Sakar þingmann um að reiða til klámhöggs

Álfheiður Ingadóttir, þingmaður Vinstri grænna, sakaði Jón Gunnarsson, þingmann Sjálfstæðisflokks, um að fara með ósannandi þegar hann hélt því fram að þingkonan hafi haft óeðlileg afskipti af störfum lögreglunnar í mótmælunum 2009. Jón tók til máls undir liðnum störf þingsins og vísaði til umræðunnar um að nokkrir þingmenn hafi stýrt fólki fyrir utan alþingishúsið þegar mótmælin á Austurvelli stóðu sem hæst. Álfheiður greip þrívegis fram í fyrir Jóni og kallaði hann lygara.

„Maður spyr sig hvort ummæli háttivirt þingmanns hér á göngunum um að lögregla gangi hart fram í því að verja alþingi og að í lagi væri að mótmælendur færu hér um alþingishúsið brytu hér allt og brömluðu. þetta eru hvort sem er (innkall álfheiðar - hættu þessum lygum jón gunnarsson) allt dauðir hlutir sagði viðkomandi þingmaður, þetta voru ummæli háttvirts þingmanns. eru þetta ummæli til þess fallinn að draga úr mótmælum eða hvetja til þeirra háttvirti forseti," sagði Jón Gunnarsson.

Álfheiður vísað í svör frá lögreglunni á höfuðborgarsvæðinu þar sem fram kemur að ekki sé minnst á nafn hennar í tengslum við samantekt lögreglunnar um mótmælin á Austurvelli. „Ég hef þegar lýst því yfir að með þessum bréfum lögreglustjórans á höfuðborgarsvæðinu hefur nafn mitt verið hreinsað af þeim ásökunum sem sumir háttvirtir þingmenn hafa verið svo smekklegir að draga hér upp. Ég á aðeins eitt orð yfir framgöngu háttvirts þingmanns Jóns Gunnarssonar og það er klámhögg," sagði Álfheiður.