Niðurskurður hafði hvorki áhrif á álag starfsmanna né þjónustu

Þótt opinberar fjárveitingar til hjúkrunarheimila hafi dregist saman að raungildi milli áranna 2008-2010 verður ekki sé að álag á starfsmenn heimilanna hafi aukist á tímabilinu, né að þjónusta hafi skerst. Þetta eru niðurstöður Ríkisendurskoðunar sem vann skýrslu að beiðni forsætisnefndar Alþingis.

Í skýrslunni er fjallað um rekstur hjúkrunarheimila fyrir aldraða á tímabilinu 2008-10, meðal annars breytingar á tekjum þeirra, kostnaði og mönnun. Úttektin náði einkum til 34 hjúkrunarheimila af samtals 43 sem starfrækt voru í landinu árið 2010. Tekjur þessara heimila eru að langstærstum hluta opinber framlög. Í heild jukust þau um 6% milli áranna 2008 og 2010. Hins vegar hækkaði vegin vísitala verðlags og launa um 12,5% á sama tíma og því er ljóst að framlögin drógust saman að raungildi. Heildartekjur heimilanna jukust að jafnaði um 7% á tímabilinu og kostnaður þeirra um svipað hlutfall. Heimilunum gekk almennt betur að laga rekstur sinn að tekjum í lok tímabilsins en við upphaf þess.

Á vef Ríkisendurskoðunar segir að framboð hjúkrunarrýma á landsvísu hafi nánast staðið í stað milli áranna 2008 og 2010. Á sama tíma hafi ellilífeyrisþegum fjölgað og meðalaldur þeirra hækkað. Engu að síður hafi fleiri aldraðir fengið hjúkrunarrými árið 2010 en árið 2008 og biðlistar styst.