Segja málefnalega ástæðu fyrir því að fella niður málið

Þingmenn Sjálfstæðisflokksins í stjórnskipunar- og eftirlitsnefnd, þau Birgir Ármannsson og Ólöf Nordal telja alveg ljóst að Alþingi geti haft frumkvæði að því að fella niður ákæru gegn Geir Haarde, fyrrverandi forsætisráðherra, og að margar málefnalegar ástæður séu fyrir því að gera það. Þetta kemur fram í áliti þeirra sem Birgir gerði grein fyrir á þingfundi í dag.

„Vandséð er hvers vegna þingmenn sem ekki töldu tilefni til að ákæra Geir H. Haarde í september 2010 ættu að telja tilefni til ákæru nú. Ekkert hefur komið fram í málinu frá þeim tíma sem eykur líkur á sakfellingu. Á hinn bóginn hefur komið fram að ýmsir þeirra sem studdu ákærutillöguna á sínum tíma telja forsendur breyttar og meta málið með öðrum hætti nú," segir í áliti þeirra.

Þau Birgir og Ólöf segja líka að frá september 2010, þegar tillaga um að ákæra Geir var samþykkt, hafi komið fram mun meiri upplýsingar um hina alþjóðlegu fjármálakreppu sem hófst á sumar- og haustmánuðum 2008 og afleiðingar hennar bæði hér á landi og erlendis. Mat á því hvað íslensk stjórnvöld áttu að gera til að bregðast við fjármálakreppunni og hvað þau gátu hugsanlega gert á þeim tíma geti því verið annað í dag en haustið 2010. Slíkt getur haft áhrif á mat manna á því hvort líklegt sé að einstakir liðir sem eftir standa í ákærunni gegn Geir H. Haarde séu líklegir til að leiða til sakfellingar. Ákvörðun um að ákæra hljóti alltaf að byggjast á mati á því að meiri líkur en minni séu á því að ákæran leiði til sakfellingar.