Ný réttargeðdeild opnuð á Kleppi í dag

Nýtt húsnæði réttargeðdeildar Landspítala á Kleppi var formlega tekið í notkun í dag. Íbúar Sogns í Ölfusi þar sem réttargeðdeildin hefur starfað síðustu tuttugu árin flytjast allir í nýja húsnæðið á Kleppi fyrir lok þessarar viku. „Með þessu hefst nýr kafli í réttargeðlækningum á Íslandi" sagði Guðbjartur Hannesson velferðarráðherra í ávarpi við opnun deildarinnar.

Það var hart deild á þá ákvörðun Landspítalans, sem tekin var í október síðastliðnum, að leggja deildina niður. Málið var meðal annars rætt á Alþingi, en þingmenn suðurkjördæmis kvörtuðu meðal annars undan því að störf töpuðust í kjördæminu.

Þetta er ekki í fyrsta sinn sem deilur skapast um rekstur deildarinnar því staðsetning réttargeðdeildar var nokkuð umdeild þegar henni var valinn staður á Sogni í Ölfusi fyrir 20 árum.