Sóknarprestur rýnir í stöðuna

Frægir prestar, rótttækir guðfræðingar og kjörinn vígslubiskup eru meðal þeirra sem gefa kost á sér sem næsti biskup Íslands. Frestur til að skila inn framboði rennur út í dag. Sóknarprestur rýndi í stöðuna fyrir biskupskjör.

Átta hafa gefið kost á sér til biskups.

Agnes M. Sigurðardóttir, í Bolungarvík.

Gunnar Sigurjónsson, í Digraneskirkju

Kristján Valur Ingólfsson, vígslubiskup í Skálholti

Sigríður Guðmarsdóttir, í Grafarholti

Sigurður Árni Þórðarson, í Neskirkju

Þórir Jökull Þorsteinsson, á Selfossi

Þórhallur Heimisson, í Hafnarfjarðarkirkju

Örn Bárður Jónsson, í Neskirkju

„Þarna eru karlar og konur, því miður aðeins tvær konur af átta. Ég hefði viljað sjá þarna fjórar konur og fjóra karla," segir Baldur Kristjánsson sóknarprestur

Hann segir kirkjuna hiklaust tilbúna fyrir konu sem biskup.

Í framboði eru fulltrúar ólíkra hópa.

„Þarna má nefna Sigríði Guðmarsdóttur sem er hiklaust rótttækur guðfræður, Sigurður Árni hneigist hiklaust líka í þá áttina. Ef ég tek á hinn bóginn eru það Þórir Jökull og kannski Gunnar Sigurjónsson sem eru frekar íhaldssamir í siðferðilegum efnum," segir Baldur.

„Og svo eru selebbin. Það eru þessir frægu. Það eru kannski Örn Bárður og Þórhallur helst. Við vitum ekki hvað það hefur að segja að vera frægur," segir Baldur. Þetta er í fyrsta skipti í Íslandssögunni sem óvígðir taka þátt í að velja biskup og hefur óvissan því aldrei verið meiri, enda hefur enginn kannað hug allra þeirra leikmanna sem nú kjósa líka.

„Þetta verður hnífjafnt. það verða tveir sem komast í úrslit," segir Baldur. „Mér er lífsins ómögulegt að spá fyrir um hverjir það verða," bætir hann við.

Biskupsstofa póstleggur kjörseðla í næstu viku, og samkvæmt starfsreglum eru gefnar tvær vikur þar til kosningu lýkur.