Harmleikur á Hótel Frón: Móðirin er sakhæf

Agné Krataviciuté, litháísk kona, sem ákærð hefur verið fyrir að skilja nýfætt barn sitt eftir í ruslagámi við Hótel Frón í sumar, er sakhæf. Þetta kom fram í Héraðsdómi Reykjavíkur í morgun þegar mál hennar var tekið fyrir.

Konan var metin sakhæf eftir að hafa verið látin sæta geðrannsókn en við þingfestingu málsins lagði verjandi hennar fram kröfu um yfirmat á sakhæfi hennar og að dómskvaddur matsmaður yrði kallaður til. Við fyrirtöku málsins í morgun kom fram að konan væri sakhæf.

Ríkissaksóknari hefur ákært konuna fyrir manndráp, með því að hafa veitt nýfæddum syni sínum tvo skurðáverka á andlit með bitvopni og banað honum síðan með því að þrengja að hálsi hans uns hann lést af völdum kyrkingar.

Atvikið átti sér stað laugardaginn 2. júlí í fyrra, á baðherbergi í herbergi númer 319 á vinnustað konunnar, Hótel Fróni á Laugavegi. Í ákæru segir að þar hafi hún fætt fullburða lifandi sveinbarn sem síðan fannst dáið í ruslageymslu í nágrenni hótelsins.

Við þingfestingu málsins sagðist konan ekki vera sammála því sem kæmi fram í ákærunni. „Ég er ekki sammála þessu. Ég drap ekki barnið" sagði hún.

Verjandi Agné fór fram á að þinghaldið yrði lokað, þingfestinguna. Dómari úrskurðaði stuttu síðar að þinghaldið skyldi vera opið og staðfesti Hæstiréttur þann dóm.

Aðalmeðferð málsins fer fram á næstu vikum.