"Þetta er valdníðsla og einelti"

„Ég er búinn að borga um 10 milljónir í lögfræðikostnað á þremur árum til þess að halda uppi mannréttindum - og ég er ekki hættur," segir Margeir Margeirsson, eigandi veitingastaðanna Monte Carlo og Mónakó á Laugavegi. Í Fréttablaðinu í dag er sagt frá því að lögreglustjórinn á höfuðborgarsvæðinu ætli ekki að endurnýja rekstrarleyfi staðanna eftir að borgarráð lagðist gegn veitingu leyfanna.

Margeir segir í samtali við Vísi í morgun að lögreglustjóri hafi unnið að því í mörg ár að koma honum af Laugaveginum. „Ég er orðinn svo leiður á því að það sé alltaf verið að segja að það sé verið að fara loka hjá mér - það er ekkert verið að fara loka hjá mér. Stefán [Eiríksson, lögreglustjóri á höfuðborgarsvæðinu, innsk.blm.] ætlaði að taka af mér leyfið og vann að því í mörg ár með allskonar klækjabrögðum," segir Margeir.

Hann segir að Innanríkisráðuneytið hafi sent Stefáni skeyti í vikunni, þar sem því var beint til hans að gefa út bráðabirgðaleyfi til þriggja mánaða á meðan málið væri til umfjöllunar. „Þegar að búið er að skoða það mál, þá kem ég til með að fá leyfi ef það eru einhver lög í landinu. Eins og borgarfulltrúar og lögreglustjóri halda, þá eru bara tvö lög í landinu og það eru „af því bara-reglan" og „mér finnst það-reglan". En það eru lög í landinu, þetta er lögleg starfsemi hjá mér. Þetta eru staðir sem eru með hvað elstu kennitölu í veitingabransanum, staðir sem hafa hvað mest traust af öllum veitingastöðum í Reykjavík."

Hann segist ósáttur og athugar nú hvort hann geti leitað réttar síns. „Þetta er valdníðsla og einelti. Þetta eru stöðug lögbrot á mér bæði frá borgarfulltrúum og lögreglu, það verða kannaðir allir möguleikar, hvort að það verði ekki hægt að lögsækja þetta fólk því prívat og persónulega. Því ég tel að þau séu að ráðast gegn einstaklingi sem hefur ekkert gert af sér," segir hann. „Þetta aumingja fólk sem er að djöflast á mér heldur það, að ef einhver á Laugaveginum gerir eitthvað af sér, þá sé það eitthvað fólk frá mér.“

Og hann gagnrýnir þá borgarfulltrúa sem hann hefur hitt. „Ég hitti borgarfulltrúana Júlíus Vífil Ingvarsson, Óttar Proppé og sjálfan borgarstjórann og sýndi þeim þessi fáránlegheit. Þeir jánkuðu þessu allir og sáu hversu fáránlegt þetta var en samt greiddu þér atkvæði um að ég hefði brotið af mér," segir hann hissa.

Og þrátt fyrir ákvörðun borgarráðs og lögreglustjóra um að endurnýja ekki leyfin segist Margeir ekki ætla að gefast upp. „Núna er ég að gera klárt fyrir daginn, það er langt þangað til ég loka."