Heldur áfram að taka saman gögn og upplýsingar um búsáhaldabyltinguna

„Hann er bara að taka saman gögn og upplýsingar," svaraði Stefán Eiríksson, lögreglustjóri á höfuðborgarsvæðinu, spurður um skýrslu Geirs Jóns Þórissonar, yfirlögregluþjóns, sem lét þau umdeildu ummæli falla í þættinum Sprengisandi á Bylgjunni í gær, að hann hefði það á tilfinningunni að búsáhaldabyltingunni í janúar árið 2009, hafi verið stýrt af þingmönnum sem sátu inni á Alþingi á þeim tíma.

Ummælin hafa fallið í grýttan jarðveg. Þá hefur Álfheiður Ingadóttir, þingmaður VG skrifað lögreglustjóranum bréf og óskað eftir upplýsingum um rannsóknina sem Geir Jón skýrði frá, og jafnframt óskað eftir öllum gögnum og upplýsingum sem kynnu um að vera um hana að finna í slíkri rannsókn, eins og fram kom í hádegisfréttum RÚV í dag.

Þegar Stefán er spurður hvort þáttur þingmanna í tengslum við búsáhaldabyltinguna sé til rannsóknar, svarar hann: „Það er engin slík rannsókn í gangi."

Aðspurður hvort það væri tilefni til slíkrar rannsóknar í ljósi ummæla yfirlögregluþjónsins svarar Stefán: „Ég tjái mig ekki um það."

Þegar lögreglustjórinn var svo spurður hvort ummæli Geirs Jóns yrðu til þess að hann yrði settur af við að safna saman fyrrgreindum gögnum og upplýsingum svaraði Stefán því til að Geir Jón yrði að störfum fram í vor eða þar til hann lætur af störfum.

Geir Jón hefur, eins og kunnugt er, boðið sig fram til 2. varaformanns Sjálfstæðisflokksins.