Geir Jón segist ekki vanur að skrökva

„Ég var nú bara að svara spurningu sem að mér var beint. Ég er nú vanur því að skrökva ekki og ég svara því sem að mér er rétt," segir Geir Jón Þórisson, yfirlögregluþjónn hjá lögreglunni á höfuðborgarsvæðinu. Ummæli hans um að einstakir þingmenn hafi verið í sambandi við mótmælendur í Búsáhaldabyltingunni sem varð aðdragandi þess að ríkisstjórn Sjálfstæðisflokksins og Samfylkingarinnar lagði upp laupana hafa verið harðlega gagnrýnd. Meðal annars hefur Steingrímur J. Sigfússon, formaður VG, og Álfheiður Ingadóttir, þingmaður flokksins, gagnrýnt þau.

Á það hefur verið bent að Geir Jón sé í framboði til annars varaformanns Sjálfstæðisflokksins. „Það er óheppilegt að blanda þessu saman - kannski eru nú viðbrögðin þess vegna en ég verð bara að láta gott af mér leiða og hef ekki vanið mig á það að skrökva upp á fólk eða vera með dylgjur," sagði Geir Jón í samtali við Reykjavík síðdegis á Bylgjunni í dag.

Geir Jón segist hafa verið að lýsa mótmælum eins og þau voru þriðjudaginn 20. janúar 2009 og 21,. janúar 2009. „Það voru bara þessir tveir dagar sem ég var að segja frá. Síðan eru menn búnir að vera að tala um að ég hafi verið að tala um alla búsáhaldarbyltinguna. Það var ekki það sem ég var að tala um," sagði Geir Jón.

Geir Jón er að taka saman skýrslu um atburðarásina í mótmælunum þegar Búsáhaldabyltingin varð. Hann segir skýrsluna gerða að beiðni lögreglustjóra. Skýrsla Geirs Jóns er byggð á upplýsingum frá lögreglumönnum sem upplifðu mótmælin og voru á vettvangi, auk frásagna frá þingmönnum og öðrum sem voru á staðnum.