Með dúfu úr Hogwarts á heimsmeistaramóti

Töframenn á borð við David Copperfield og Darren Brown verða á meðal gesta á heimsmeistaramóti töframanna sem Einar Mikael tekur þátt í á næstunni.

„Ég mun láta gegnheilt mahóníborð svífa í lausu lofti með töfradúfu frá Hogwarts sitjandi á því allan tímann," segir Einar Mikael Sverrisson töframaður sem keppir fyrstur Íslendinga á Heimsmeistaramóti töframanna í Blackpool í Englandi. Þar mun hann sýna ofangreint töfrabragð og keppa við um 150 töframenn.

Einar segir aðeins útvalda fá þátttökurétt á mótinu. „Þér þarf að vera boðið inn á þetta og verður að sýna atriði sem hefur ekki sést áður. Jafnframt þarftu að vera virkur töframaður í samfélaginu og að hafa tekið þátt í góðgerðarsýningum því þeir vilja að heimsmeistarinn sé góð fyrirmynd."

Samkvæmt Einari koma allir bestu töframenn heims saman á mótinu til þess að láta plata sig. „David Copperfield og Darren Brown mæta pottþétt. Þeir eru stórstjörnurnar í þessu og koma til að upplifa eitthvað magnað aftur," segir hann og bætir við að þekktir töframenn kaupi oft áhugaverð atriði og að stórar umboðsskrifstofur séu á höttunum eftir einhverju óvenjulegu.

Einar frumsýndi keppnisatriðið fyrir ári og hefur verið að betrumbæta það síðan. „Ég hef verið að bæta inn í það ýmsu eins og töfradúfunni. Það hefur alveg tekið ár að þjálfa hana," segir hann en fuglinn, sem heitir Prins, valdi hann fyrir meistaranám sitt í töfrafræðum við Hogwarts School of Witchcraft and Wizardy. Hann lýkur náminu í fjarnámi í sumar en áður hefur hann lokið grunnnámi þaðan. „Ég er að sérhæfa mig í dúfutöfrabrögðum og sjónhverfingum," segir hann og svarar ákveðinn að skólinn sé til í alvörunni. „Það bar ekki mikið á skólanum fyrr en myndirnar með Harry Potter komu út en þetta er leynisamfélag eins og allt tengt töfrabrögðum," segir Einar en margir kannast aðeins við skólann af sögusviði Harry Potter bókanna.

Mótið stendur yfir dagana 9. til 14. júlí og er haldið af alþjóðlegum samtökum töframanna eða FISM, sem stendur fyrir The Fédération Internationale des Sociétés Magiques, á þriggja ára fresti.

Töfrabrögð Einars má sjá á tofrabrogd.is.

hallfridur@frettabladid.is