Rannsókn á brunanum að hefjast

„Það eru allar líkur á því að það hafi verið kveikt í, segir Jóhannes Ólafsson yfirlögregluþjónn í Vestmannaeyjum. Lögreglan er nú að byrja að rannsaka hvernig eldur kom upp í tveimur bifreiðum í Skvísusundi í Vestmannaeyjum. Hann segir að búið sé að ræða við eiganda bílanna og það sé ekkert sem ætti að hafa kveikt eldinn.

Eins og sagt var frá hér á Vísi og í morgunfréttum Bylgjunnar munaði minnstu að stórtjón yrði þegar hátt í tíu metra háar eldtungur úr tveimur logandi bílum sleiktu vegg trésmíðaverkstæðisins sem bílarnir stóðu við og rúður voru farnar að springa í húsinu.

Þannig var umhorfs þegar slökkviliðið í Eyjum kom á vettvangum klukkan hálf þrjú í nótt og hóf slökkvistarf af fullum krafti, þannig að eldtungurnar náðu ekki að læsa sig í innviði hússins.

Slökkvistarf gekk vel, en eldurinn virðist hafa verið kveiktur í fólksbíl, sem var inni í vörukassa aftan á litlum flutningabíl, og náð að magnast mjög á skammri stundu. Bílarnir eru báðir gjörónýtir.