Innlent

Minna atvinnuleysi vegna brottfluttra Íslendinga

Höskuldur Kári Schram skrifar
Ætla má að atvinnuleysi væri mun meira eða í kringum ellefu prósent ef þúsundir Íslendinga hefðu ekki flúið land eftir hrun. Vinnumálastofnun hefur greitt um fimmtíu milljarða í atvinnuleysisbætur á síðastliðnum tveimur árum.

Aldrei hafa jafn margir flutt af landi brott eins og á síðastliðnum tveimur árum. Brottfluttir umfram aðflutta voru tæplega sjö þúsund samkvæmt tölum hagstofunnar, þar af um sex þúsund manns á vinnualdri.

Ástandið á vinnumarkaði hér heima hefur verið erfitt eftir að kreppan skall á og því hafi margir kosið að flytja til útlanda í leit að vinnu. Ætla má að atvinnuleysi væri mun meira ef ekki hefði komið til þessa.

Atvinnuleysis mældist átta prósent í síðasta mánuði sem jafngildir því að um 12.745 hafi verið án vinnu. Ef hins vegar þessir sex þúsund sem fluttu til útlanda hefðu allir lent á atvinnuleysisskrá hefði atvinnuleysi mælst rúmlega ellefu prósent.

Vinnumálastofnun hefur ekki skoðað sérstaklega áhrif búferlaflutninga á atvinnuleysistölur. Gissur Pétursson, forstjóri Vinnumálastofnunar, sagði hins vegar í samtali við fréttastofu að færri væru á atvinnuleysisskrá vegna þessa.

Hvert prósentustig í atvinnuleysi kostar ríkissjóð á bilinu tvo til þrjá milljarða á ári.

Á síðustu tveimur árum hefur vinnumálastofnun greidd tæpa fimmtíu milljarða í atvinnuleysisbætur. Á þessu ári er áætlað að stofnunin greiði um tuttugu og einn milljarð í bætur.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.