Lífið

Jón Gnarr talar inn á Múmínálfamynd

Jón Gnarr er Snúður í íslensku útgáfunni af Múmínálfamyndinni. Það voru framleiðendur myndarinnar með Tom Carpelan fremstan í flokki sem óskuðu eftir því að fá Jón. fréttablaðið/Stefán
Jón Gnarr er Snúður í íslensku útgáfunni af Múmínálfamyndinni. Það voru framleiðendur myndarinnar með Tom Carpelan fremstan í flokki sem óskuðu eftir því að fá Jón. fréttablaðið/Stefán
„Ég mátti velja hlutverkið sjálfur,“ segir Jón Gnarr, borgarstjóri Reykjavíkur.

Jón talar fyrir eina aðalpersónuna í þrívíddarteiknimyndinni Múmíndalurinn og halastjarnan sem verður frumsýnd hér á landi um helgina. „Ég fór til Finnlands fyrir nokkru og hitti þá framleiðendur myndarinnar og aðstandendur hennar. Þeir höfðu heyrt að ég hefði talað vel um Múmínálfana og Múmíndalinn og buðu mér í kjölfarið hlutverk í íslensku talsetningunni,“ segir borgarstjórinn.

Jón er sjálfur Snúður, besti vinur Múmínsnáðans, sem hefur ráð undir rifi hverju. „Hann og Múmínpabbi hafa alltaf verið í miklu uppáhaldi hjá mér og ég vildi fyrst tala fyrir Múmínpabba en hann var bara með svo fáar línur.“ Fjöldi annarra þekktra Íslendinga talar inn á teiknimyndina en það er Sveppi sem fer með hlutverk Múmínsnáðans. „Hann stendur sig mjög vel en senuþjófurinn er Sigurjón Kjartansson, hann er stórkostlegur sem Hemúllinn.“ Þeir sem hafa lesið bækurnar um Múmínálfana vita sennilega að Hemúllinn er fremur fýlugjarn einstaklingur með allt á hornum sér.

Þetta er í annað sinn sem Jón talar inn á teiknimynd. Hitt skiptið var fyrir ansi mörgum árum, þá var hann ráðgjafi Mulan í samnefndri teiknimynd frá Disney. Jón kveðst vera himinlifandi með myndina sjálfa og að nú standi til að gefa bækurnar eftir Tove Jansson aftur út. „Múmínálfarnir og lífsspeki þeirra eiga svo mikið erindi við okkur í dag.“- fgg





Fleiri fréttir

Sjá meira


×


Tarot dagsins

Dragðu spil og sjáðu hvaða spádóm það geymir.