Góðkunningjar Óskars líklegir til afreka á næsta ári

Það styttist í að tilkynnt verði hvaða myndir verða tilnefndar til Óskarsverðlauna. Kvikmyndaspekúlantar eru að sjálfsögðu byrjaðir að velta vöngum yfir því hvaða nöfn verða birt á flatskjánum í Hollywood og flestir eru á sama máli; það verða kunnugleg andlit meðal hinna útvöldu.

Tilnefningarnar til Óskarsverðlauna verða kunngjörðar í lok janúar. Tilnefning getur ýmsu breytt og því ekkert skrýtið að kvikmyndagerðarmenn skuli eyða háum fjárhæðum í að koma sínum verkum á framfæri við Akademíuna. Íslenskir kvikmyndaunnendur verða að bíða enn um sinn eftir „vandaða" pakkanum frá Hollywood – janúar og febrúar hafa yfirleitt verið gjöfulir hvað slíkar gjafir varðar.

Kunnugleg andlit

Vefsíðan Deadline tók saman lista yfir þá leikstjóra sem líklegastir eru til að hljóta tilnefningu. Þeir eiga það flestir sameiginlegt að hafa komið við sögu Akademíunnar áður. Sumir hafa jafnvel hlotið styttuna góðu oftar en einu sinni á meðan aðrir hafa verið tilnefndir nógu oft til að geta loks gert tilkall til verðlaunanna. Steven Spielberg er í fyrrnefnda hópnum. Hann hefur verið tilnefndur til Óskarsverðlauna fimm sinum og hlotið verðlaunin í tvígang; fyrir Schindler's List og Saving Private Ryan. Kvikmyndarinnar War Horse, sem Spielberg leikstýrir, er beðið með mikilli eftirvæntingu enda hafa bæði bókin og leikritið notið mikila vinsælda. Deadline segir myndina hafa allt til brunns að bera; miklar tilfinningar og stórfengleg hasaratriði. Annar reynslubolti, sem þó hefur haft það fyrir sið að sniðganga hátíðina, er Woody Allen. Leikstjórinn þykir sýna gamla takta í Midnight in Paris en hann hefur verið tilnefndur fjórtán sinnum til verðlaunanna. Deadline segir Akademíuna varla geta gengið fram hjá Allen í ljósi þess að Midnight in Paris hafi hlotið einróma lof gagnrýnenda og gekk vel í miðasölu. Akademían mun vafalítið einnig eiga erfitt með að hunsa Martin Scorsese og ævintýramynd hans Hugo sem fengið hefur stórkostlega dóma. Scorsese, þótt ótrúlegt megi virðast, hefur aðeins einu sinni hlotið styttuna góðu þrátt fyrir að hafa verið tilnefndur sex sinnum og Akademían mun alla tíð hafa það á samviskunni að hafa valið úlfadans Kevins Costner fram yfir Goodfellas á sínum tíma. Nafn Scorsese verður næstum örugglega í pottinum.

Fincher talinn heitur

Svo eru það hinir sem hafa daðrað við styttuna, hlotið tilnefningu en aldrei náð á toppinn. Alexander Payne og kvikmynd hans, The Descendants, hafa átt góðu gengi að fagna og nafn Davids Fincher og Karla sem hata konur hefur verið nefnt á nokkrum vefsíðum. Kvikmyndanirðir virðast hafa tröllatrú á amerískri aðlögun sænska þríleiksins eftir Stieg Larsson. Hið sama má segja um Stephen Daldry, hann hefur gert þrjár kvikmyndir og verið tilnefndur fyrir þær allar. Nýjasta kvikmynd hans, Extremely Loud and Incredibly Close, þykir nokkuð spennandi en myndin segir frá afleiðingum árásanna á Tvíburaturnana.

Clooney orðaður við Óskar

Og svo er það George Clooney, leikarinn og leikstjórinn sem Akademían dýrkar.

The Ides of March hefur fengið prýðisgóðar viðtökur, umfjöllunarefnið er pólitískt og hver vill ekki vera vinur George Clooney? Jason Reitman, leikstjóri Juno og Up In The Air, þykir einnig líklegur fyrir kvikmynd sína Young Adult, sömuleiðis Bennett Miller með kvikmynd sína Moneyball og svo er það hið óvænta; Michel Hazanavicius og kvikmynd hans The Artis.

Hún er þögul og í svarthvítu en hvar sem myndin hefur verið sýnd hafa áhorfendur risið úr sætum og klappað henni lof í lófa. Myndin hefur unnið flest aðalverðlaun á þeim kvikmyndahátíðum sem hún hefur tekið þátt í og því er ekki óhugsandi að The Artist gæti orðið Öskubuskusaga ársins.

freyrgigja@frettabladid.is