Eyðir áramótunum á Íslandi

„Mig langaði að komast burt frá brjálæðinu í London í smá tíma og fannst því tilvalið að eyða áramótunum á Íslandi,“ segir hinn hálfíslenski Fredrik Ferrier, en hann er raunveruleikastjarna í Bretlandi.

Ferrier, sem á íslenskan föður, ætlar að eyða áramótunum á Íslandi með systur sinni og fjölskyldu hennar sem eru búsett hér á landi. „Ég ætla að njóta mín með fjölskyldunni, skoða næturlífið aðeins og ferðast út á land til að finna náttúruperlur,“ segir Ferrier, en hann varð mikil stjarna í Bretlandi á árinu eftir að raunveruleikaþátturinn Made in Chelsea sló í gegn.

„Þátturinn hefur verið svakalega vinsæll og um 1 milljón horfir á hann vikulega. Búið er að samþykkja seríu 3 en hún fer í tökur á næsta ári,“ segir Ferrier og bætir við að hann sé ekki búinn að ákveða hvort hann vilji vera með í næstu seríu og segist vera með fullt af öðrum verkefnum í bígerð.

„Ég er að hugsa málið og þarf að ákveða hvaða skref er best að taka næst,“ segir Ferrier, sem er fyrirsæta og tónlistarmaður en hann spilar á fiðlu og gítar. Ferrier ætlar að nýta tímann hér á landi til að kíkja í búðir á Íslandi en hann er mjög hrifinn af skandinavískum fatastíl. „Ég hlakka til að sjá hvað Ísland hefur upp á að bjóða og ætla að kynna mér íslenska hönnun. Systir mín kemur með mér og ég treysti því að hún sé með puttana á púlsinum í þeim efnum.“ - áp