Magga Gnarr stefnir hátt í poppbransanum

Söngkonan Margrét Gnarr hefur látið lítið fyrir sér fara síðan hljómsveitin Merzedes Club lagði upp laupana. Margrét frumflytur nýtt lag í kvöld.

„Ég held að þetta sé poppslagari," segir söngkonan Margrét Edda Gnarr um lagið Waiting for an Accident sem hún frumflytur í kvöld á tískusýningu verslunarinnar KISS á barnum Buddha í miðborg Reykjavíkur.

Margrét stefnir hátt í poppbransanum og hyggst hefja vinnu að plötu á næstu dögum. „Við erum að byrja að vinna í plötu núna og það verður örugglega á næsta ári sem ég gef meira út," segir hún.

Andrea Ólafsdóttir samdi textann við lagið og Einar Örn Kristjánsson og Einar Óli Sigurðarson sömdu lagið. „Semsagt tveir sem heita Einar," segir Margrét og hlær.

Hún hefur látið lítið fyrir sér fara síðan hún tók við af Rebekku Kolbeinsdóttur sem söngkona í hljómsveitinni sálugu Merzedes Club. Hún hefur þó ekki setið með hendur í skauti þar sem hún vann silfurverðlaun í tveimur flokkum á WBFF-Evrópumótinu í fitness á dögunum.

„Ég er búin að vera frekar róleg, en fór í söngnám í söngskólanum í Reykjavík. Ég hef alltaf stefnt að þessu," segir Margrét. „Ég var að keppa í fitness og hafði því lítinn tíma fyrir tónlistina þá. En strax eftir keppnina fór ég að einbeita mér að laginu og klára það fyrir tískusýninguna."

Hvernig fara popp og fitnessið saman?

„Bara vel. Ég fer á svið í módelfitnessinu og það er mjög gott fyrir sjálfstraustið."

Margrét er dóttir Jóns Gnarr borgarstjóra. Hún játar að reynsla hans úr skemmtanabransanum geti komið að góðum notum.

„Já, ég get alltaf talað við hann. Hann er náttúrulega búinn að vera í þessum bransa svo lengi."

Er hann búinn að heyra lagið?

„Nei, það er enginn búinn að heyra lagið."

atlifannar@frettabladid.is