Tróðu upp á litlum klúbbi

Breska hljómsveitin Coldplay lenti í vandræðum á tónleikum sínum í London á þriðjudagskvöld. Sveitin tróð upp á 500 manna klúbbi, Dingwalls, en þar voru einir af fyrstu tónleikum þeirra haldnir árið 1998. Ókeypis var inn á tónleikana fyrir heppna aðdáendur sveitarinnar.

Coldplay hefur nær eingöngu troðið upp á íþróttaleikvöngum síðustu ár og því voru mikil viðbrigði fyrir liðsmenn sveitarinnar að koma fram á Dingwalls. Chris Martin og félagar gerðu nokkrar misheppnaðar tilraunir til að hefja tónleikana áður en það á endanum tókst. Allt fór þó vel að lokum og aðdáendurnir fengu að heyra öll bestu lög sveitarinnar og eitt jólalag í bónus.