Mugison græjaði fjögur þúsund eintök í Höllinni

Björgvin Halldórsson hertók Laugardalshöllina um helgina með Jólagesti sína. Þegar mest lét voru um 140 manns á sviðinu í einu og því var sægur af fólki baksviðs.

Tónlistarmaðurinn Örn Elías Guðmundsson, Mugison, sá sér þarna leik á borði og fékk tónlistarfólkið til að hjálpa sér að föndra umslög fyrir plötu sína, Haglél. Eins og Fréttablaðið hefur greint frá hefur Mugison ekki undan að framleiða eintök af plötunni, vel yfir tólf þúsund eintök eru seld og upplagið stefnir í meira en tuttugu þúsund eintök.

Tónlistarfólkið, sem mestmegnis var kórsöngvarar, var greinilega mikið hagleiksfólk því hermt er að á milli fjögur og fimm þúsund eintök hafi verið kláruð baksviðs í Höllinni.