Fimm uppáhaldskjólar Rakelar Mjallar

Rakel Mjöll Leifsdóttir, söngkona hljómsveitarinnar Útidúr, á marga fallega kjóla og þá sérstaklega sviðskjóla. Hún kveðst hrifnust af kvenlegum sniðum og segir uppáhaldsverslunina sína vera "vintage" búð sem hún rakst á í Pittsburgh.



1. kjóll

"Þennan kjól saumaði Ragna Sigríður Bjarnadóttir, vinkona mín, á mig fyrir Airwaves-hátíðina í ár. Hún er að læra fatahönnun við LHÍ og hefur saumað mikið á mig í gegnum árin.

Ég klæddist þessum kjól þegar Útidúr kom fram í Iðnó og hann var hannaður sérstaklega fyrir það tilefni. Þetta er ekki kjóll sem ég mundi nota hversdags enda er þetta meira hugsað sem sviðskjóll."

2. kjóll

„Kjólinn fékk ég í verslun Rauða krossins. Hann var miklu síðari og minnti svolítið á brúðarkjól en ég klippti helminginn af honum og nota svo hinn helminginn í annað.

Þetta er kjóll sem ég nota aðeins á sviði, eini gallinn við hann er að ég á það til í að festa mig í strengnum á gítarnum hans Gunnars, sem er með mér í Útidúr, og hann hefur flogið í fiðlurnar líka."

3. kjóll

„Þessi kjóll er eftir Mariu Cornejo, hönnuð frá Brooklyn. Hún hannaði þennan kjól á mig og annan eins á systur mína fyrir það þegar við komum fram í Carnegie Museum.

Þetta er sannkallaður gyðjukjóll og hann er metinn á 200 þúsund krónur og mér þykir mjög vænt um hann. Ég hef klæðst honum í brúðkaup en þess utan hef ég lítið notað hann því hann er svo rosalega fínn."

4. kjóll

„Þessi kjóll er líka úr smiðju Rögnu, vinkonu minnar. Þetta var Airwaves-kjóllinn árið 2009 og ég var í honum þegar ég kom fram með hljómsveitinni Sykur.

Mér líður alltaf svolítið eins og Batman í þessum kjól því hliðin á honum er fest upp eins og vængur. Það kemur ofsalega vel út á sviði en virkar ekki jafn vel við önnur tækifæri. Ragna hefur hannað á mig kjóla allt frá því að ég var 16 ára gömul og tók þátt í söngvakeppnum."

5. kjóll

„Þessi kjóll er frá árinu 1940 og ég keypti hann í „vintage" verslun í Pittsburgh. Ég og systir mín komum fram með Ragnari Kjartanssyni í Carnegie Museum og í heilan mánuð fengum við aðeins tvo frídaga, öðrum þeirra eyddum við í fyrrnefndri „vintage" búð.

Elsta flíkin þar inni var frá 1880 og sú nýjasta frá 1980. Kjóllinn er í algjöru uppáhaldi bæði því að sniðið er svo fallegt og svo finnst mér efnið líka skemmtilegt. Sem betur fer fer ég aftur út í mars og þá ætla ég að kaupa meira í sömu búð."