Nikita færir út kvíarnar

Nikita hefur hannað og látið framleiða eigin snjóbrettalínu sem kemur á markað í Evrópu, Asíu og Ameríku með haustinu 2012. Mikilvægum áfanga náð segir Aðalheiður Birgisdóttir einn eigenda og stofnenda fyrirtækisins.

„Alveg frá því við stofnuðum Nikita árið 2000 hefur staðið til að framleiða snjóbretti samhliða útvistar- og lífsstílsfatnaði því þar liggja okkar rætur. Hins vegar er þetta erfiður bransi og samkeppnin hörð. Við ákváðum því að bíða þar til réttar aðstæður sköpuðust. Svo loksins gafst tækifærið á þessu ári og við gripum það," segir Aðalheiður, betur þekkt sem Heiða.

Snjóbrettalínan frá Nikita verður fyrst og fremst stíluð inn á „stelpur á öllum aldri" eins og annað sem fyrirtækið framleiðir. „Brettin taka mið af líkamsbyggingu kvenna, eru styttri og mjórri en tíðkast og í sömu litum og fatalínur Nikita. Tvær gerðir verða í boði, annars vegar „parkstreet"-bretti til notkunar innanbæjar og hins vegar „freestyle"-bretti sem henta við allar aðstæður," upplýsir Heiða og getur þess að snjóbrettaskór og -bindingar verði framleidd er fram líða stundir.

Í fyrra framleiddi fyrirtækið snjóbretti í samstarfi við K2, einn stærsta og virtasta snjóbrettaframleiðanda heims. Brettin voru hönnuð undir merkjum beggja fyrirtækja og náðu góðri sölu sem Heiða segir hafa haft áhrif á að fyrirtækið lagði í eigin framleiðslu.

„Viðtökurnar bentu sterklega til að mikil eftirspurn væri eftir snjóbrettum fyrir stelpur. Skrefið sem við tókum með brettunum þótti okkur líka vera til marks um vöxt fyrirtækisins sem er nú með starfsemi í fjórum löndum og selur vörur í 1.500 verslunum um allan heim. Við erum ekki lengur nýja fyrirtækið frá Íslandi heldur höfum fest okkur í sessi. Þar af leiðandi er mikilvægt að halda kúnnunum spenntum með því að koma reglulega á óvart. Brettin eru liður í því og verður vonandi vel tekið enda til vitnis um þá gríðarlegu vinnu sem liggur að baki öllu sem frá Nikita kemur."

roald@frettabladid.is