Ingibjörg Sólrún á leið til Kabúl

Ingibjörgu Sólrúnu Gísladóttur, fyrrverandi formanni Samfylkingarinnar og fyrrverandi utanríkisráðherra Íslands, hefur verið boðið starf yfirmanns UN Women í Kabúl, höfuðborg Afganistans. Þetta staðfesti Ingibjörg Sólrún við Fréttablaðið í gær. Hún er nú í viðræðum við stofnunina um að taka að sér starfið, en slíkar ráðningar eru tímafrekar sökum pappírsvinnu og annars.

UN Women er stofnun innan Sameinuðu þjóðanna sem vinnur í þágu kvenna og jafnréttis í þróunarlöndum og á stríðssvæðum. Einna stærstu verkefni stofnunarinnar eru í Afganistan og starf yfirmanns er því umfangsmikið. Auk þess að vera yfir UN Women er yfirmaður stofnunarinnar hluti af teymi Sameinuðu þjóðanna í landinu og vinnur náið með öðrum stofnunum þeirra.

Ingibjörg Sólrún hætti í stjórnmálum árið 2009. Hún sótti um starf mansalsfulltrúa Öryggis- og samvinnustofnunarstofnunar Evrópu sama ár og komst í lokahóp umsækjenda en fékk ekki starfið. - þeb