Vatnsauðlindinni tryggð vernd

Innleiðing vatnatilskipunar Evrópusambandsins er hafin í samræmi við lög sem voru samþykkt á Alþingi vorið 2011 um stjórn vatnamála. Lögin fela í sér innleiðingu vatnatilskipunarinnar í íslenskan rétt. Tilgangurinn er að tryggja verndun og heilnæmi vatns á Íslandi til framtíðar.

Innleiðing og framkvæmd þessa nýja kerfis vatnastjórnar gerist í áföngum í sex ára tímabilum. Innleiðingartímabil er frá 2011 til 2015, fyrsta framkvæmdatímabil 2016 til 2021 og annað framkvæmdatímabil frá 2022 til 2026.

Skrifað var undir samninga við Hafrannsóknastofnun, Veðurstofu Íslands og Veiðimálastofnun á miðvikudag um fyrstu verkefnin á innleiðingatímabilinu. Á næstu vikum verða síðan útbúnir samningar við fleiri stofnanir um verkefni sem vinna þarf á næsta ári.

Lokaafurð innleiðingartímabilsins er vatnaáætlun sem Umhverfisstofnun mun gera tillögu að. Gert er ráð fyrir að vatnaáætlunin verði samþykkt af umhverfisráðherra í lok árs 2015. Vöktunaráætlun kemur til framkvæmda eigi síðar en 1. janúar 2015 og aðgerðaáætlunin eigi síðar en á árinu 2018.- shá