Enn ósamið við flugfreyjurnar

Liðsmenn Flugfreyjufélags Íslands felldu nýjan kjarasamning við Icelandair. Er þetta öðru sinni í þessari lotu sem flugfreyjur hjá fyrirtækinu hafna samningi sem samninganefnd þeirra hefur gert.

„Þetta eru viss vonbrigði en við áttum alveg eins von á þessu,“ segir Margrét Svavarsdóttir, gjaldkeri Flugfreyjufélagsins. Að sögn Margrétar greiddu 119 atkvæði með samningnum en 128 voru á móti og fjórir skiluðu auðu. Þátttakan í atkvæðagreiðslunni var 65 prósent. Margrét segir að ný samninganefnd verði skipuð um helgina. Verkfall er boðað hjá flugfreyjum dagana 24. og 25. október. Ekki náðist í talsmann Icelandair.

- gar