Búðin hefur aðdráttarafl

Bókabúðin Mál og menning var opnuð á Laugavegi 18 5. október árið 1961 af Máli og menningu bókmenntafélagi sem hafði þá starfað sem útgáfufélag og bókaforlag frá árinu 1937.

„Bókabúðin hefur nú starfað undir sama nafni og á sama stað í fimmtíu ár og því munum við fagna með ýmsu móti,“ segir Kristján Freyr Halldórsson sem nýverið tók við sem verslunarstjóri í bókabúðinni sögufrægu. Hann nefnir meðal annars ljósmyndasýningu sem sett verður upp á öllum hæðum verslunarinnar. „Myndirnar fengum við hjá Ljósmyndasafni Reykjavíkur og sýna bókabúðina að innan og utan á hinum ýmsu tímabilum,“ útskýrir Kristján sem hefur verið viðloðandi bókabúðina í mörg ár.

„Ég byrjaði að vinna hér árið 2000 í blálokin á rekstri búðarinnar undir merkjum Máls og menningar bókmenntafélags og hef því unnið hjá nærri öllum rekstraraðilum sem komið hafa af versluninni,“ segir hann glaðlega.

Um aldamótin 2000 sameinaðist Mál og menning bókaútgáfunni Vöku-Helgafelli og Edda, miðlun og útgáfa varð til. Edda seldi þá rekstur Bókabúða Máls og menningar, sem voru orðnar sex talsins, til Pennans árið 2003. Bókabúð Máls og menningar við Laugaveg var ekki breytt þó að Penninn færði aðrar verslanir undir undir merki Eymundsson. Penninn seldi síðan Kaupangi verslunina við Laugaveg árið 2009 en undir stjórn þeirra aðila fór verslunin í þrot snemma á þessu ári. Bókabúð Máls og menningar opnaði síðan aftur snemmsumars undir stjórn nýrra eigenda.

„Mér finnst gleðilegt að nafn búðarinnar hafi haldist það sama í gegnum allar þessar breytingar enda mikil saga sem fylgir búðinni og húsinu. Hér hefur margt merkilegt fólk bæði starfað og verið fastagestir,“ segir Kristján. Hann segir hið nýja eignarhaldsfélag vilja byggja á hinum gamla og góða grunni og hnýta saman strengi fortíðar og framtíðar. Það lýsi sér til dæmis í nafni félagsins, Rúblan ehf.

„Rúblan er í eigu sömu aðila og reka verslunina IÐU við Lækjargötu en með nafni félagsins er vísað í þá flökkusögu að húsið hafi verið byggt fyrir rúblur fengnar að styrk frá ráðamönnum í Sovétríkjunum á tímum kalda stríðsins,“ útskýrir Kristján. Mál og menning var enda lengi tengt við sósíalista á Íslandi og var húsið að Laugavegi 18 oft nefnt Rúblan vegna orðrómsins um „Rússagullið“.

En hvað verður fleira gert í tilefni afmælisins?

„Fyrir utan ljósmyndasýninguna sem verður opin til áramóta verða ýmsar uppákomur og tilboð á ýmsum titlum. Við verðum með barnabókaveislu, rithöfundar sem sótt hafa verslunina reglulega koma í heimsókn og tónlistarmenn munu fylla húsið ljúfum tónum,“ segir Kristján og býður alla velkomna.

solveig@frettabladid.is